Naturalismus (Bildende Kunst)

Dr Naturalismus in dr Kunst isch e Ströömig vo öbbe 1850 bis 1900 gsi. As Epochebegriff isch er aber in dr Bildende Kunst weniger scharf definiert als in dr Litratuur. Dr Begriff Naturalismus wird in dr Bildende Kunst eender brucht as Bezäichnig für e Daarstelligswiis, unabhängig vo dr Zit, as als Epochebegriff. Wenn s um d Absichte goot, wo mit ere naturalistische Daarstelligswiis verfolgt wärde, reedet mä vilmol eender vo Realismus.

Mä cha d Begriff Naturalismus und Realismus also nid genau von enander abgränze. Es git sonigi, wie dr Kunsthistoriker Georg Schmidt, wo dängge, ass s Ziil vom Naturalismus die perfekti, wärtfreiji Abbildig sig, wääred es im Realismus uf die «inneri Woorhet» aachiem, also uf s Wääsentlige, und nid so seer uf die «üsseri Erschiinig» wie bim Naturalismus. Im Geegesatz drzue giengs bim Idealismus drum d Wirklichkäit hööcher zmache, zum Bischbil e müthologischi Szene z verklääre.